ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានរម្លឹកពីតម្លៃនៃសន្ដិភាពដែលបានផ្ដល់នូវការរស់រាន ការអភិវឌ្ឍ និងរីកចំរើន ដោយថាកម្ពុជាបានឱ្យតម្លៃសន្ដិភាពនេះមុនប្រជាធិបតេយ្យ និងសិទ្ធិមនុស្ស។ សម្ដេចបានឱ្យក្រលេកមើលស្ថានភាពអ៊ុយក្រែនពេលនេះជាឧទាហរណ៍នៃតម្លៃសន្ដិភាព។

ថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការនូវស្ពានអាកាស និងផ្លូវក្រោមដីចោមចៅនាព្រឹកថ្ងៃទី៣១ ខែមីនា ឆ្នាំ២០២២នេះ សម្ដេចតេជោ ហ៊ុន សែន ថាបច្ចុប្បន្នពិភពលោកកំពុងស្រែករកសន្ដិភាព និងការពារសន្ដិភាពជាងពេលណាទាំងអស់ដោយសារឥទ្ធិពលនៃសង្គ្រាមរុស្ស៊ី-អ៊ុយក្រែន និងសង្គ្រាមលោកលើកទី៣។

សម្ដេចបានបន្ថែមថា ពេលនេះនៅទ្វីបអឺរ៉ុបក្រៅពីមានបញ្ហាដែលចង់បាននូវសន្ដិភាព ក៏កើតមាននូវបញ្ហាថ្មីមួយទៀតគឺបញ្ហាជនភៀសខ្លួន និងការរើសអើងជាតិសាសន៍ថែមទៀត។

សម្ដេចតេជោថា៖ «មិនប្រកដអ្នកនិយាយពីបញ្ហាមិនរើសអើង អ្នកនិយាយពីបញ្ហាប្រជាធិបតេយ្យនិងសិទ្ធិមនុស្សល្អទេ»។

សម្ដេចតេជោ ប្រកាសជាថ្មីទៀតថានឹងបន្តការពារសន្ដិភាពដែលកម្ពុជាទទួលបានដោយលំបាកនេះបន្តទៀត ដើម្បីការរីកចម្រើន និងភាពសុខសាន្តនៃប្រជាជន៕ 

^{PHOTO: EAC NEWS}